عمران خان خود اپنے سب سے بڑے دشمن ہیں، مصطفی کمال

*مورخہ: 19 نومبر، 2022*

(پریس ریلیز)

پاک سرزمین پارٹی کے چیئرمین سید مصطفیٰ کمال نے کہا ہے کہ عمران خان خود اپنے سب سے بڑے دشمن ہیں، بین القوامی میڈیا کو بتا رہے ہیں کہ میرے ملک کے اداروں، میرا وزیراعظم اور میرا وزیر داخلہ مجھ کو قتل کرنا چاہتے ہیں، اسطرح کے بیانات سے عمران خان دنیا بھر میں پھیلے پاکستان دشمن ایجنسیوں کو ملک میں خانہ جنگی پھیلانے کے لیے اپنے ہی قتل کا سنہری موقع فراہم کردیا ہے، جسکا الزام وہ پہلے ہی ملک کے اداروں، وزیر اعظم اور وزیر داخلہ پر لگا چکے ہیں۔ جس فوج نے عمران خان کو اقتدار میں لانے کے لیے خود کو بدنام کرلیا، عمران خان آج اقتدار سے الگ ہونے پر اسی فوج کے اتنے خلاف ہوگئے کہ ملک کو نقصان پہنچانے لگے۔ توشہ خانے کی گھڑیوں کے افسوسناک واقعات نے پوری قوم کا سر شرم سے جھکا دیا ہے پاکستانی ہونے کے ناطے ایسا محسوس ہو رہا ہے جیسے ہم نے وہ گھڑیاں چوری کی ہوں۔ پچھلے 71 سالوں میں پاکستان کا قرضہ 31 کھرب تھا لیکن عمران خان نے صرف پونے چار سال میں پاکستان کے قرضوں میں 32 کھرب قرضے کا مزید اضافہ کردیا اور آج پاکستان کا قرضہ 63 کھرب ہوچکا ہے۔عمران خان قوم کو ریاست مدینہ سنائیں نہیں بلکہ دکھائیں۔ ان خیالات کا اظہار انہوں نے پاکستان ہاؤس میں پریس کانفرنس کرتے ہوئے کیا۔ اس موقع پر صدر پی ایس پی انیس قائم خانی اور اراکین سینٹرل ایگزیکٹو کمیٹی و نیشنل کونسل بھی انکے ہمراہ موجود تھے۔ سید مصطفیٰ کمال نے مزید کہا کہ لاالہ الااللہ ہر بات سے آزاد نہیں بلکہ اللہ کے نظام کا پابند کرتا ہے، لاالہ الااللہ یہ نہیں کہتا ہے کہ آپ رانا ثنا اللہ کی گاڑی میں ہیروئن رکھوا دیں، نیب کے چئیرمین کی نازیبا وڈیو بنوا کر اپنے مخالفین پر مقدمات بنوائیں۔ تمام مخالف سیاستدانوں اور میڈیا ہاؤسز کے مالکان کو جیلوں میں بند کروا دیا جو آپکے ہی دور اقتدار میں عدالتوں سے بری ہو گئے۔ قرآن جھوٹ بولنے والے پر اللہ کی لعنت دیتا ہے اور نبی کریم حضرت محمدﷺ کی حدیث کے مطابق مسلمان جھوٹ نہیں بول سکتا لیکن عمران خان سارا دن جھوٹ بولتے ہیں۔ انہوں نے قوم سے وعدہ کیا کہ 90 دن میں کرپشن ختم کردیں گے، نہیں کی! 50 لاکھ گھر بنا کر دینگے، نہیں دیے۔ ایک کروڑ نوکریاں دیں گے، نہیں دیں! آئی ایم ایف سے قرضہ نہیں لیں گے، قرضہ لیا! وزیر اعظم اور وزراء اعلیٰ ہاؤس کو یونیورسٹی میں تبدیل کردیں گے، نہیں کیا۔ جس پیپلز پارٹی کی قیادت کو برا بھلا بولتے نہیں تھکتے وقت پڑنے پر انہی سے سینٹ کا چئیر مین بنانے کے لیے ووٹ لیئے۔ جس زہرہ شاہد کے قتل کا زمہ دار ایم کیو ایم کو قرار دیتے تھے وزیراعظم بننے کے لیے اسی ایم کیو ایم کو نفیس لوگ قرار دیا۔ جب تک جہانگیر ترین، علیم خان اور عون چودھری عمران خان کے لیے پیسے اور ایم پی ایز، ایم این ایز کو توڑ توڑ کر لاتے رہے وہ مثالی کردار کے حامل تھے، لیکن مطلب نکل جانے پر وہ سب کرپٹ اور فراڈ ہوگئے، اس لیے کل آپ کے پاس پھر وزارت عظمیٰ آگئی تو عمران خان آج جس مرحوم ارشد شریف، اعظم سواتی اور شہباز گل پر دن رات سیاست کررہے ہیں، انکا نام بھی نہیں لیں گے۔ گزشتہ 14 سال سے ٹی وی پر صرف عمران خان ہیں، جو بچہ چودہ سال پہلے 4 سال کا تھا آج وہ 18سال کا ہوگیا اور آج عمران خان اسی ٹی وی پر بیٹھ کر مسلسل جھوٹ بول کر اداروں کو بدنام کررہے ہیں رہے ہیں۔ عمران خان جیل کے حالات بتا رہے ہیں تو جیل خانہ جات صوبائی معاملہ ہے، خیبرپختونخوا میں 10 سال سے اور پنجاب میں 5 سال سے عمران خان کی صوبائی حکومت ہے، اس حساب سے تو جیلوں میں ایک بھی مظلوم اور بے بس انسان کو نہیں بلکہ سارے کرپٹ لوگوں کو بند ہونا چاہیے تھا لیکن ایسا نہیں ہے۔ مقبولیت حق پر ہونے کا پیمانہ نہیں ہے، فرعون اور یزید بھی اپنے دور میں مقبول اور طاقتور ترین تھے لیکن دونوں کے حصے میں ذلت آئی کیونکہ عزت اور ذلت دینے والا صرف اللہ ہے، عوامی مقبولیت نہیں!

پاکستان کا معاشی انجن کراچی موجودہ اور سابقہ نااہل، کرپٹ اور متعصب حکومتوں کی غلط پالیسیوں کی وجہ سے ایک جانب تباہی کا شکار ہوچکا ہے، ارشد وہرا

*مورخہ: 15 نومبر، 2022*

(پریس ریلیز)

پاک سرزمین پارٹی کے وائس چیئرمین ڈاکٹر ارشد وہرا نے کہا ہے کہ پاکستان کا معاشی انجن کراچی موجودہ اور سابقہ نااہل، کرپٹ اور متعصب حکومتوں کی غلط پالیسیوں کی وجہ سے ایک جانب تباہی کا شکار ہوچکا ہے تو دوسری جانب سینکڑوں سال پیچھے چلا گیا ہے۔ بنیادی سہولیات کے فقدان اور انفرا اسٹرکچر کی زبوں حالی کی وجہ سے کارخانے یا تو بند ہو رہے ہیں یا پھر معیشت کا پہیہ چلانے کی خاطر مہنگے وسائل استعمال کرنے پر مجبور ہیں۔ کراچی کی فیکٹریوں کو گیس کی فراہمی بند ہونے کی وجہ سے بوائلرز چلانے کے لیے ایندھن کے طور پر مجبوراً کوئلے اور لکڑیوں کا استعمال کیا جا رہا ہے جسکی وجہ سے ناصرف کاروباری لاگت میں ہوش ربا اضافہ ہو گیا ہے بلکہ انتہائی شدید ماحولیاتی آلودگی کا سبب بن رہا ہے۔ اس صورتحال میں پاکستان کی نصف سے زائد برآمدات متاثر ہونے کا خدشہ ہے۔ وزیراعظم شہباز شریف اور وفاقی وزیر توانائی خرم دستگیر فوری طور پر اس سنگین مسئلے کا نوٹس لیں اور صنعتی شعبے سمیت گھریلو صارفین کو گیس کی مسلسل فراہمی یقینی بنائیں۔ بصورت دیگر فیکٹریاں بند ہونے سے بے روزگاری میں مزید اضافہ ہوگا جس سے امن و امان کی صورتحال مزید خراب ہوگی۔

نوجوانوں کی تعلیم ملک کی ترقی و خوشحالی کی ضامن ہے، شبیر قائم خانی

 

*مورخہ: 14 نومبر، 2022*

(پریس ریلیز)

پاک سر زمین پارٹی کے وائس چیئرمین شبیر احمد قائم خانی نے کہا کہ پی ایس پی کے وائس چیئرمین شبیر قائم خانی نے کہا کہ جس حساب سے شہر کی آبادی میں اضافہ ہو رہا ہے اسی کو مد نظر رکھتے ہوئے نئے کالجز کا قیام ناگزیر ہے بصورت دیگر تعلیم کی کمی معاشرتی برائیوں کا سبب بنتی ہے۔ نوجوانوں کی تعلیم ملک کی ترقی و خوشحالی کی ضامن ہے۔ ان خیالات کا اظہار انہوں نے مینجنگ ڈائریکٹر (MD) سندھ ٹیکنیکل ایجوکیشن اینڈ ووکیشنل ٹریننگ اتھارٹی (STEVTA) ڈاکٹر مصطفیٰ سہاگ سے ملاقات کے دوران کہی۔ انہوں نے کراچی (ضلع وسطی) میں موجود ٹیکنیکل انسٹیٹیوٹس میں طلبہ و طالبات کے داخلہ برائے سیشن ۲۰۲۲-۲۰۲۳ پر اور آبادی کے لحاظ سے نئے سرکاری ٹیکنکل کالجز کے قیام پر تفصیلی گفتگو کی، جس پر MD STEVTA سمیت تمام ڈاریکٹرز نے یقین دہانی کروائی۔ ملاقات میں شبیر قائم خانی کے علاؤہ پاک سرزمین اسٹوڈنٹس فیڈریشن کے اعلیٰ سطحی وفد میں ممبر نیشنل کونسل و صدر پاک سرزمین اسٹوڈنٹس فیڈریشن (پاکستان)انجینئر سید عثمان، جوائنٹ انچارجز میں سفیر احمد،رضا قادری اور دیگر بھی شامل تھے۔

مجاہد کالونی ناظم آباد نمبر 7 کے غریب مکینوں کو متبادل جگہ فراہم کئے بغیر غریبوں کے گھروں کو مسمار کرنا سراسر زیادتی ہے ، شبیر قائم خانی

*مؤرخہ: 12 نومبر، 2022*

(پریس ریلیز)

پاک سر زمین پارٹی کے وائس چیئرمین شبیر قائم خانی نے کہا کہ اختیارات اور وسائل پر قابض پیپلز پارٹی کی نااہل، کرپٹ، متعصب اور ظالم حکومت مسائل کو حل کرنے کی صلاحیت سے ناصرف نابلد ہے بلکہ مسائل کو ایک جگہ سے اٹھا کر دوسری جگہ منتقل کرکہ مسائل کو مزید گھمبیر بنا دیتی ہے۔ مجاہد کالونی ناظم آباد نمبر 7 کے غریب مکینوں کو متبادل جگہ فراہم کئے بغیر غریبوں کے گھروں کو مسمار کرنا سراسر زیادتی ہے کیونکہ یہ ہزاروں افراد ہوا میں تحلیل نہیں ہوجائیں گے، یہ کسی اور جگہ کو انکروچ کریں گے۔ جس طرح سید مصطفی کمال کے دورِ نظامت میں لیاری ایکسپریس وے کی تعمیر کے دوران 34 ہزار گھروں کو منہدم کرنا پڑا تھا لیکن تمام مکینوں کو متبادل جگہ فراہم کی گئی۔ لیاری ایکسپریس وے کی تعمیر کے وقت ریاست، عدلیہ اور بلدیاتی حکومت نے ہزاروں گھر منہدم کرنے سے پہلے متاثرین کے لئے بنیادی سہولیات سے آراستہ 3 آبادیاں بنائیں گئیں، عین اسی طرح مجاہد کالونی کے مکینوں کو بھی متبادل جگہ آباد کیا جائے۔ ان خیالات کا اظہار انہوں نے مجاہد کالونی میں اہلیان مجاہد کالونی کے احتجاجی مظاہرے اور دھرنے سے خطاب کرتے ہوئے کیا۔ شبیر قائم خانی کی قیادت میں پی ایس پی کے وفد نے پی ایس پی کی جانب سے اہلیان مجاہد کالونی کو مکمل تعاون کی یقین دہانی کرائی۔ شبیر قائم خانی نے حکومت سندھ سے مطالبہ کیا ہے کہ مسائل کو ایک جگہ سے دوسری جگہ شفٹ کرنے کی بجائے مجاہد کالونی کے مسئلے کو سید مصطفی کمال کےدورِ نظامت کے لائحہ عمل پر عملدرآمد کرتے ہوئے مجاہد کالونی کے مکینوں کو بھی متبادل جگہ فراہم کی جائے۔

رسک الاؤنس کی بندش کے خلاف سندھ بھر کے ڈاکٹرز، پیرا میڈیکل اسٹاف، نرسز اور گرینڈ ہیلتھ الائنس کی جانب سے جاری احتجاج پر پولیس کی جانب سے مظاہرین اور خصوصاً خواتین مظاہرین پر ریاستی تشدد کی سخت ترین الفاظ میں مزمت ، ارشد وہرا

*مؤرخہ: 12 نومبر 2022*

(پریس ریلیز)

پاک سر زمین پارٹی کے وائس چیئرمین ارشد وہرہ نے رسک الاؤنس کی بندش کے خلاف سندھ بھر کے ڈاکٹرز، پیرا میڈیکل اسٹاف، نرسز اور گرینڈ ہیلتھ الائنس کی جانب سے جاری احتجاج پر پولیس کی جانب سے مظاہرین اور خصوصاً خواتین مظاہرین پر ریاستی تشدد کی سخت ترین الفاظ میں مزمت کرتے ہوئے کہا کہ اختیارات اور وسائل پر قابض پیپلز پارٹی کے کرپٹ اور متعصب حکمران ظلم کی ہر حد پار کرچکے ہیں۔ سندھ حکومت احتجاجی ہیلتھ ورکرز کے مطالبات ماننے کے بجائے اوچھے ہتھکنڈے استعمال کر رہی ہے جو سراسر ظلم ہے۔ ارشد وہرہ نے سندھ حکومت سے مطالبہ کرتے ہوئے کہا کہ طاقت کی بجائے مفاہمت کی پالیسی کو اپناتے ہوئے مسائل حل کریں۔ سندھ حکومت کورونا رسک الاؤنس کو فوری بحال کرے اور گرفتار مظاہرین کو گی الفور رہا کیا جائے

کراچی کے نوجوانوں کو تعلیم سے محروم رکھنے کے لیے تاریخی ڈی جے کالج کو بند کرنے کی حکومتی سازش پر گہری تشویش کا اظہار، مصطفی کمال

*مؤرخہ: 10 نومبر، 2022*

(پریس ریلیز)

پاک سر زمین پارٹی کے چئیر مین سید مصطفیٰ کمال نے کہا کہ کراچی کے نوجوانوں کو تعلیم سے محروم رکھنے کے لیے تاریخی ڈی جے کالج کو بند کرنے کی حکومتی سازش پر گہری تشویش کا اظہار کرتے ہوئے اس عمل کو کراچی دشمنی اور ملک دشمنی قرار دیا ہے۔ اختیارات و وسائل پر قابض پیپلز پارٹی کی ظالم متعصب اور کرپٹ حکومت نے 14 سال میں پاکستان کی معاشی شہ رگ کراچی کو اپنی ازلی تعصب کی نظر کرتے ہوئے ہر لحاظ سے تباہ و برباد کردیا ہے۔ پیپلزپارٹی کی متعصب سندھ حکومت نے بنیادی سہولیات سے محروم کراچی کے نوجوانوں پر پہلے ہی نوکریوں کے دروازے بند کیے ہوئے ہیں اور اب کراچی کی پہچان تعلیمی اداروں کو بلکل اسی طرح بند کرکہ اپنے دفاتر میں تبدیل کررہے ہیں جیسے سندھ کے تعلیمی اداروں کو بند کرکہ زاتی اصطبل اور اوطاقوں میں تبدیل کردیا گیا ہے۔ ان خیالات کا اظہار انہوں نے پی ایس پی اسٹوڈنٹس فیڈریشن کے عہدے داران سے گفتگو کرتے ہوئے کیا۔ انہوں نے مزید کہا کہ پی ایس پی پیپلز پارٹی کی سندھ حکومت کو متنبہ کرتی ہے کہ وہ ہوش کے ناخن لے اور کراچی دشمنی پر مشتمل فیصلوں سے باز رہے۔ پیپلز پارٹی کراچی کو لاوراث اور پی ایس پی کو ایم کیو ایم سمجھنے کی غلطی نا کرئے۔ کراچی کی وارث پی ایس پی موجود ہے۔ پاک سر پارٹی اپنی پوری طاقت سے پیپلزپارٹی کے اس متعصبانہ فیصلے کے خلاف کھڑی ہے۔

مجاہد کالونی ناظم آباد نمبر 7 میں متبادل جگہ فراہم کئے بغیر غریبوں کے گھروں کو مسمار کرنے کو سرار ظلم ہے مصطفی کمال

*مؤرخہ: 8 نومبر، 2022*

(پریس ریلیز)

چئیر مین پاک سر زمین پارٹی سید مصطفیٰ کمال نے مجاہد کالونی ناظم آباد نمبر 7 میں متبادل جگہ فراہم کئے بغیر غریبوں کے گھروں کو مسمار کرنے کو سرار ظلم قرار دیتے ہوئے کہا کہ اگر ان لوگوں کو متبادل جگہ فراہم نہیں کی گئی تو یہ ہزاروں افراد کسی اور جگہ کو انکروچ کریں گے، یہ ہزاروں لوگ ہوا میں تحلیل نہیں ہونگے، ریاست کا کام مسائل کو حل کرنا ہوتا ہے ناکہ مسائل کو ایک جگہ سے دوسری جگہ شفٹ کرنا۔ ریاست ماں جیسی ہوتی ہے اور چھت فراہم کرنا ریاست کی زمہ داری ہے۔ ان خیالات کا اظہار انہوں نے پاکستان ہاؤس کراچی میں مجاہد کالونی ناظم آباد نمبر 7 کے پختون برادری سے تعلق رکھنے والے معززین سے ملاقات کے دوران گفتگو کرتے ہوئے کہی۔ انہوں نے مزید کہا کہ میرے دورِ نظامت میں لیاری ایکسپریس وے کی تعمیر کے دوران 34 ہزار گھروں کو منہدم کرنا پڑا تھا لیکن تمام مکینوں کو متبادل جگہ فراہم کی گئی۔ لیاری ایکسپریس وے کی تعمیر کے وقت ریاست، عدلیہ اور بلدیاتی حکومت نے ہزاروں گھر منہدم کرنے سے پہلے متاثرین کے لئے 3 آبادیاں بمع بنیادی سہولیات بنائیں، 80 گز کا پلاٹ اور 50 ہزار روپے کا چیک دیا گیا۔ سید مصطفیٰ کمال نے حکومت سندھ سے مطالبہ کرتے ہوئے کہا کہ مسائل کو ایک جگہ سے دوسری جگہ شفٹ کرنے کے بجائے مجاہد کالونی کے مسئلے کو میرے دورِ نظامت کے لائحہ عمل پر عملدرآمد کرتے ہوئے مجاہد کالونی کے مکینوں کو بھی متبادل جگہ فراہم کی جائیں۔

انصاف کے لانگ مارچ پر فائرنگ کے نتیجے میں چئیر مین تحریک انصاف عمران خان سمیت کئی کارکنان کے زخمی ہونے کے افسوسناک واقعے کی شدید مزمت

 

*مورخہ: 3 نومبر، 2022*

(پریس ریلیز)

چئیرمین پاک سر زمین پارٹی سید مصطفیٰ کمال کی جانب سے تحریک انصاف کے لانگ مارچ پر فائرنگ کے نتیجے میں چئیر مین تحریک انصاف عمران خان سمیت کئی کارکنان کے زخمی ہونے کے افسوسناک واقعے کی شدید مزمت؛ چئیر مین پی ایس پی سید مصطفیٰ کمال نے پی ٹی آئی کے جانبحق کارکن کے لیے مغفرت اور عمران خان سمیت تمام زخمی افراد کی جلد صحتیابی کی دعا بھی کی۔

عمران خان کے جھوٹے بیانیے کو مسلم لیگ(ن) اور پیپلزپارٹی کی کرپٹ، متعصبانہ اور موروثی سیاست سے زِیر نہیں کیا جاسکتا۔ مصطفی کمال

*مورخہ: 2 نومبر ، 2022*

(پریس ریلیز)

پاک سرزمین پارٹی کے چیئرمین سید مصطفیٰ کمال نے کہا کہ عمران خان کے جھوٹے بیانیے کو مسلم لیگ(ن) اور پیپلزپارٹی کی کرپٹ، متعصبانہ اور موروثی سیاست سے زِیر نہیں کیا جاسکتا۔ عمران خان کے حمایتیوں کو بھی علم ہے کہ عمران خان جھوٹ بول رہے ہیں لیکن وہ پھر بھی انکی حمایت انکی محبت میں نہیں۔ بلکہ لوگ پیپلز پارٹی اور مسلم لیگ(ن) کی متعصبانہ، کرپٹ اور موروثی سیاست سے تنگ ہیں۔ تمام تر زیادتیوں کے باوجود ریاستی اداروں کے اعلٰی ظرف کا مظاہرہ کرتے ہوئے غلطیوں کا اعتراف کر کے غلطیوں کو سدھارنے کے عزم کے اظہار پر قوم انکے ساتھ کھڑی ہے۔ پاکستان کی بقاء اداروں کی مضبوطی سے وابستہ ہے۔ ان خیالات کا اظہار انہوں نے اراکینِ سینٹرل ایگزیکٹو کمیٹی و نیشنل کونسل اراکین کے اجلاس سے خطاب کرتے ہوئے کیا۔ سید مصطفیٰ کمال نے مزید کہا کہ باپ وزیراعظم اور بیٹا وزیر اعلیٰ کی پالیسی نے حکمران اتحاد کو نقصان اور عمران خان کو فائدہ پہنچایا ہے۔ اگر ان عہدوں پر کوئی اور شخصیات ہوتیں تو لوگ اس طرح عمران خان کے ساتھ باہر نہ نکلتے لیکن عوام کو بادشاہت قبول نہیں۔ عمران خان کے بیانیے کو اپنی اقربا پروری سے سپورٹ کیا جا رہا ہے۔

مصطفیٰ کمال کاگزشتہ 24 گھنٹوں کے دوران شہر کراچی سے لاپتہ نوجوانوں کی لاشیں سندھ کے مختلف اضلاع سے برآمد ہونے پر شدید تشویش کا اظہار

 

 

*مؤرخہ: 14 ستمبر، 2022*

(پریس ریلیز)

پاک سر زمین پارٹی کے چئیرمین سید مصطفیٰ کمال نے گزشتہ 24 گھنٹوں کے دوران شہر کراچی سے لاپتہ نوجوانوں کی لاشیں سندھ کے مختلف اضلاع سے برآمد ہونے پر شدید تشویش کا اظہار کرتے ہوئے کہا کہ اگر ان نوجوانوں کا کوئی جرم تھا تو انہیں عدالتوں میں پیش کرنا چاہیے تھا، عدالتیں فیصلہ کرتی کہ یہ نوجوان مجرم تھے یا نہیں۔