ناعاقبت اندیش حکمرانوں نے ملک کو شدید سیاسی اور معاشی عدم استحکام کا شکار کردیا ہے جو کسی بھی ملک کی سلامتی اور خودمختاری کے لیے زہر قاتل ہے۔ مصطفی کمال
February 14, 2022
*مؤرخہ: 14فروری 2022*
( پریس ریلیز)
چیئرمین پاک سرزمین پارٹی سید مصطفیٰ کمال نے کہا ہے کہ ناعاقبت اندیش حکمرانوں نے ملک کو شدید سیاسی اور معاشی عدم استحکام کا شکار کردیا ہے جو کسی بھی ملک کی سلامتی اور خودمختاری کے لیے زہر قاتل ہے۔ موجودہ مخدوش نظام کے تحت پاکستان نہیں چل رہا اور اس بوسیدہ نظام کے تحت ملک کو مزید چلانے کی ضد پاکستان کو ناقابلِ تلافی نقصان پہنچا رہی ہے۔ نااہل اور کرپٹ حکمرانوں نے جہاں ایک جانب پاکستان کی سلامتی اور خود مختاری کو آئی ایم ایف کے پاس گروی رکھ دیا ہے تو وہیں دوسری جانب قیامت خیز مہنگائی اور ریکارڈ توڑ بےروزگاری نے غریب اور خصوصاً سفید پوش متوسط طبقے کو موت کی دہلیز تک دھکیل دیا ہے، پڑھے لکھے نوجوان خودکشیاں کرنے پر مجبور ہوچکے ہیں، بھوک اور افلاس نے اسٹریٹ کرائمز اور ڈکیتیاں عام کردی ہیں، ملک میں جان بوجھ کر صرف آقا اور غلام کے طبقے بنائے جارہے ہیں ۔ نااہل حکمران روزانہ کی بنیاد پر بجلی، پیٹرول، گیس اور اشیاء ضرورت کی قیمتوں میں ہوشربا اضافے کرکہ جہاں ایک جانب ملک کو خانہ جنگی کی جانب دھکیل رہے ہیں تو دوسری جانب ملک دشمن طاقتوں کو اپنے مذموم مقاصد کی تکمیل کے لیے کھلا میدان دے رہے ہیں۔ پاکستان کے نااہل حکمران کل کے دہشتگرد آج بنا رہے ہیں۔ سب سے زیادہ افسوس کی بات تو یہ ہے کہ حکومت اور اپوزیشن اپنی تمام تر توانائیاں ایک دوسرے کو گرانے اور نمبر گیم میں خرچ کررہی ہیں، پاکستان کا المیہ یہ ہے کہ ایوانوں میں موجود سیاسی جماعتوں کو عام آدمی کی کوئی فکر نہیں۔ ان خیالات کا اظہار انہوں نے بلدیہ ٹاؤن میں عوامی رابطہ مہم سے خطاب کرتے ہوئے کیا۔ انہوں نے مزید کہا کہ پاک سر زمین پارٹی کے علاؤہ عوام کے پاس اب کوئی دوسرا آپشن نہیں، پاک سر زمین پارٹی کے بتائے گئے فارمولے کے علاؤہ پاکستان کو ٹھیک کرنے کا کوئی دوسرا طریقہ نہیں۔ عوام اور ادارے جتنی دیر سے ہماری بات مانیں گے اتنا ہی نقصان پاکستان اٹھائے گا۔ الحمد لله، ہمارے بتائی گئی تین آئینی ترامیم میں کراچی سے کشمیر تک کے عوام کا دائرہ ہے۔ وقت نے ثابت کردیا کہ ہم یوٹرن لینے والے لوگ نہیں۔