ملک کو چلانے کیلئے گرینڈ نیشنل ڈائلاگ کی ضرورت ہے، مصطفی کمال
November 26, 2020
*مورخہ 26 نومبر 2020*
(پریس ریلیز) پاک سرزمین پارٹی کے چیئرمین سید مصطفیٰ کمال نے کہا ہے کہ ملک کو چلانے کیلئے گرینڈ نیشنل ڈائلاگ کی ضرورت ہے، موجودہ نظام مکمل طور پر ناکام ہو چکا ہے۔ ملک میں اس وقت حکمرانوں اور اپوزیشن کے رویوں کی وجہ سے آئینی بحران ہے جسکا فائدہ ملک دشمن عناصر کو ہو رہا ہے۔ بالخصوص کراچی میں لسانی، سیاسی اور فرقہ وارانہ فالٹ لائنز موجود ہیں جن پر کام کر کے بھارت یہاں قتل و غارتگری کرا کر پاکستان میں امن و امان کی صورتحال کو سبوتاش کراتا رہا ہے، موجودہ آئینی بحران اور بڑھتی ہوئی ناامیدی ملک دشمنوں کے لیے بہترین موقع بن کر ابھر رہی ہے۔ تمام محب وطن پاکستانیوں کو فیصلہ کرنا ہوگا کہ انہیں ملک کو کس سمت میں لے کر جانا ہے اور اس کے لیے 10، 20 اور 100 سالہ اہداف طے کرنے ہونگے جن کہ بنیاد پر تمام سیاسی جماعتوں کو اپنا پارٹی منشور بنا کر لائحہ عمل دے کر عوام سے مینڈیٹ لینا چاہیے۔ اب بھی تمام ادارے، سیاستدان، عدلیہ اور دیگر اسٹیک ہولڈرز ایک جگہ ملک کو چلانے کیلئے اکھٹے نہ ہوئے تو ملک تباہی کے راستے پر گامزن رہے گا۔ ہمیں اپنی آئندہ آنے والی نسلوں کے مستقبل کو محفوظ بنانے اور حقیقی معنی میں آزادی حاصل کرنے کے لیے اپنی ذاتی اناء اور غصے کو بالائے طاق رکھ کر ملکی مفاد میں فیصلے کرنے ہونگے۔ ان خیالات کا اظہار انہوں نے پاکستان ہاؤس میں شمولیت کے لیے آنے والے وفد کے اراکین سے بات کرتے ہوئے کیا۔