موجودہ حکمران عوامی مسائل کے حل کیلئے سنجیدہ نہیں ہیں، مصطفی کمال
May 15, 2020
مؤرخہ 15 مئی 2020
چیئرمین پاک سر زمین پارٹی سید مصطفی کمال نے کہا کہ موجودہ حکمران عوامی مسائل کے حل کیلئے سنجیدہ نہیں ہیں، کرونا سے متعلق وزیراعظم کی تمام پریس کانفرنس ایک دوسرے کی متضاد ہیں جسکی وجہ سے عوام بے یقینی کا شکار ہوگئے ہیں۔ لاک ڈاؤن میں نرمی کے دوران عوام کا بڑی تعداد میں سڑکوں پر آنا اس بات کا ثبوت ہے۔ وفاقی اور صوبائی حکومتیں عوامی مسائل حل کرنے کے بجائے ایک دوسرے کیخلاف بیان بازی میں مصروف ہیں جسکی وجہ سے عام آدمی کے مسائل میں مزید اضافہ ہوگیا ہے، حکمران پچھلے ڈھائی مہینے سےعوام کو گمراہ کرکے صرف اپنی سیاست چمکانے میں لگے ہوئے ہیں نتیجتاً اب تک کروڑوں لوگ بے روزگار ہوگئے۔ وزیر اعظم عمران خان خود کراچی سے منتخب ہوئے، اس شہر سے صدر، وزیراعظم، گورنر کے علاوہ 14 اراکین قومی اسمبلی اور 26 اراکین صوبائی اسمبلی ہونے کے باوجود آج تک کوئی نظر نہیں آیا۔ ان خیالات کا اظہار انہوں نے پی ٹی آئی اوور سیز سعودی عرب کے صدر کمال احمد آفریدی، لیاری ٹاؤن کے علاقے چیل چوک ،نوا لین کے رہائشی اور علاقہ معززین کی بڑی تعداد نے پی ایس پی میں شمولیت کے موقع پر گفتگو کرتے ہوئے کیا۔ انہوں نے کہا کہ لوگ ہمارے کردار، صلاحیت، خدمت اور بھائی چارے کے جزبے کو اپنی آنکھوں سے دیکھ کر روزانہ کی بنیاد پر ہم سے جڑ رہے ہیں، جبکہ تمام تر اختیارات اور وسائل رکھنے کے باوجود صدر، وزیراعظم، وزراء اعلیٰ اور مئیر کی جماعتیں ٹوٹ پھوٹ کا شکار ہیں۔ انہوں نے کہا کہ پاک سر زمین پارٹی کا ایک کونسلر بھی نا ہونے کے باوجود آج ہر پاکستانی کے دل کی آواز بن چکی ہے، انہوں نے کہا کہ پی ایس پی فاؤنڈیشن اپنی مدد آپ کے تحت ضرورت مند اور سفید پوش خاندانوں میں دن رات راشن تقسیمِ کر رہی ہیں