حکومت کی جانب سے دو ماہ کے مختصر عرصے میں ادویات کی قیمتوں میں دوسری دفعہ ہوش ربا اضافے پر صدر پی ایس پی انیس قائم خانی کا اظہار تشویش

March 9, 2019

مہنگائی کے اس دور میں جب غریبوں کے لئے دو وقت کی روٹی کھانا ہی مشکل ہے ایسے میں دواؤں کی قیمتوں میں ایک بار پھر اضافہ ان کی جانوں سے کھیلنے کے مترادف ہے

پاک سر زمین پارٹی کے صدر انیس قائم خانی نے حکومت کی جانب سے دو ماہ کے مختصر عرصے میں ادویات کی قیمتوں میں دوسری دفعہ ہوش ربا اضافے پر گہری تشویش کا اظہار کیا ہے۔ اپنے ایک بیان میں انہوں نے کہا کہ مہنگائی کے اس دور میں جب غریبوں کے لئے دو وقت کی روٹی کھانا ہی مشکل ہے ایسے میں دواؤں کی قیمتوں میں ایک بار پھر اضافہ ان کی جانوں سے کھیلنے کے مترادف ہے ۔ انہوں نے کہا کہ سرکاری اسپتالوں میں ویسے ہی مریضوں کو علاج و معالجے کی مناسب سہولیتں اور ادویات میسر نہیں ہیں جس کی وجہ سے غریب عوام اپنی اور اپنے پیاروں کی جان بچانے کے لئے مہنگی دوائیں بازار سے خریدنے پر مجبور ہیں جو کہ قابل مذمت ہے ۔ انہوں نے وزیراعظم پاکستان ، وزیراعلیٰ سندھ، اور صوبائی وزیر صحت سے مطالبہ کیا ہے کہ ملک بھر خصوصاً صوبہ سندھ میں جان بچانے والی اورعام استعمال کی ادویات میں ہونے والے اضافے کا فی الفور نوٹس لیں اور ادویات کی قیمتوں میں کمی کرنے کے لیے مثبت اقدامات بروئے کار لائے جائیں